戚黛黛喺香港時間前晚10點於意大利一個小城嘅古堡，同細佢兩年嘅副機師男友楊智龍（Calvin）舉行浪漫意國婚禮，圈中姊妹只有朱凱婷同張紫櫻（車車）出席，車車仲話自己強搶到個花球，佢似乎好恨嫁喎！
忍唔住眼濕濕
據知婚禮現場大約有八十名來自世界各地包括中、美、英、法、日、加同香港嘅親朋戚友，一齊見證黛黛同Calvin最美一刻！黛黛噚晚接受電話訪問表示：「噚日幾開心，但有少少狼狽，因為突然落大雨，行禮喺室外，喺裏面等咗一陣影相，之後停咗雨，好在只係延遲咗少少，爸爸同舅父夾band，我哋唱歌，感覺好溫馨，我同老公多謝大家時忍唔住眼濕濕。」
姊妹朱凱婷接受訪問時話：「喺婚禮上面，證婚人仲講咗個好感動嘅古仔，叫佢哋要互相愛對方，話無論結咗婚幾多年，都要當自己係一個lover咁樣，keep住愛火！」朱凱婷形容黛黛同Calvin全程都好開心、好high，一對新人之後開派對，跳first dance之外，又同爸爸跳舞。
撰文：馮仁昭