【金鐘→旺角→尖沙嘴】現年45歲辣媽鍾麗緹（Christy）雖然經歷過兩段婚姻並有三個女兒，但仍吸引年輕12歲的張倫碩追求，二人去年在內地真人騷《如果愛》撻着，上月初張倫碩向女友跪地求婚，開心得Christy大叫「我願意」。
Christy曾透露婚禮將於今年10月或11月舉行，而前兩段婚姻她也從未正式穿過婚紗，所以希望今次穿着婚紗及大搞。昨日Christy與張倫碩、大女Yasmine、二女Jaden和細女Cayla一家五口來港，原來是陪囡囡返港睇醫生外，更相約著名時裝設計師何國鉦（Dorian）商討婚宴禮服設計事宜。
昨午Christy一家五口離開下榻的金鐘港麗酒店後，乘七人車前往旺角惠豐中心，一行人於個多小時後離開，記者問她此行來港目的？Christy笑說：「帶小朋友睇醫生，睇眼嘅醫生，我都喺呢度睇。」她表示會留港至星期一，說罷便一家人往尖沙嘴午膳，逗留至下午3時半離開。記者問Christy是否找Dorian造衫？她說：「婚紗我搵咗，我哋會着好多衫嘅，我哋個wedding theme係under the sea。」
記者之後聯絡Christy，她透過微信回覆：「返嚟搵好朋友Dorian，睇吓有乜suggestion可以幫我design。我自己有婚紗，但我嗰晚會換好多衫，我哋可能會表演跳舞、唱歌。」至於婚禮舉行日期？Christy表示希望今年10月或11月，一切視乎工作才能決定。
之後，Christy再到旺角與Dorian見面，至晚上7時許，二人一起離開大廈，她搭住Dorian笑說：「靠晒你啦！」之後二人擁抱及錫錫道別。
採訪、攝影：羅德光、黃曉程